Auctor et conditor totius creaturæ, Dominus Jesus Christus, a quo quicquid boni habemus accepimus, ipso id spondente, ex ipsis bonis sibi oblatis remunerationem illos qui ei optulerint credimus adepturos. Ammonet namque ut faciamus nobis amicos de Mammona iniquitatis, qui nos recipiant in æternis tabernaculis. Quidam etiam sapiens inter cetera sua dicta ita affatur inquiens: «Honora Dominum de tua substantia, ut ab eo benedictionem accipiant tua horrea.» His et his similibus corroboratus exemplis, ego Durannus et mea mater Æva donamus Domino Deo et ad locum Cluniacum, qui dedicatus est in honore Petri et Pauli, beatorum apostolorum, sub regimine domni Odilonis abbatis constitutum, aliquid ex nostra hereditate, pro animarum nostrarum redemptione omniumque parentum nostrorum salute. Sunt autem ipse res in villa Canivas: hoc est unam vineam que habet de tribus partibus viam publicam et de quarta terra Sancti Petri, excepto unam rasciam que est Tetberge. Et in alio loco in ipsa villa unum campum, qui habet ex tribus partibus terra Sancti Petri et de quarta terra Sancti Benedicti. Item in ipsa villa donamus alium campum, qui terminat a mane terra Sancti Martini, a sero terra Biseldi, a cercio terra Sancte Marie, a medio autem die est terra quam Ermangerius patri meo vendidit. Item in ipsa villa donamus alium campum qui terminat a mane Achini, a medio die terra Sancti Martini, a sero terra Hildrici, a cercio terra Girbaldi. Signum Duramni et matris sue Evæ, qui hanc donationem fecerunt. S. Engelgerii. S. Tedaldi. S. Hicberti. S. Duramni. S. Siliberti. S. Danihelis.